gransi pori e gransegoe de San Piero in Volta, moeche, schie e altre delizie

Sti magnari povari, (noialtri se credevimo povari, sensa saver invesse quanto che gerimo siori!) i gera impagabili, fati in casa: none, zie le preparava, qualche omo giutava, nuialtri (altri zii, cugini, mi e me fradelo...qualche amigo, qualche colega) portavimo do tre fiaschi de vin, bussolai.

Gera cussì anca da me zia Palmira co la ne invitava a magnar gransi pori, NO QUEI DE DESSO, che vien da chi sa dove, ma quei de San Piero in Volta, insieme a qualche gransegola.

Li bogiva nela pignata granda de la lissia ("lissia"= lisciva, no gera ancora nato el nono de l'inventor de la lavatrice), la ne preparava la tola de cusina (me pareva che la gavesse el piano de cemento, quela volta le gera quasi tute cuss', otima par pestarghe sora), bela neta sensa tovagia, in meso de la tola solo un tager, un martelo, i pesi de oton de la balansa.
Co i gera pronti, gransi e gransegole i gera messi in meso e scomissiavimo, col martelo e i pesi a schissar sate e corasse, a far le parti sensa cortei, sensa pironi, doparando solo le man, a rosegar e ciuciar, a far comenti su quelo che gera bon e quelo che gera ancora più bon. Do tre ombre de vin bianco a temperatura ambiente (anca el frigo gera ancora da vegnir), bussolai (no de queli morbidi de desso che se sfregola co gnente, ma quei duri, tipo galeta, da barca, desavii, bianchissimi, che no se trova più gnanca a San Piero), anca quei da rompar col martelo. Dopo bastava un pomo, e dele volte ghe gera anca de le fritole fate co la suca al posto dei vovi.

Dopopransi indimenticabili.

Desso, tuti i veci de quela volta i xe 'ndai, tuti i putei de quela volta xe deventai noni e bisnoni, ma el ricordo xe sempre vivo.

Me nona Elvira, pensè che la aveva un gato, el Momi, e la ghe comprava sempre un scartosseto de schie tute le volte (tuti i giorni!) che la 'ndava a Rialto, ma gera i ani 30/40...

Adesso le schie xe deventae magnar da re.

Ma par mi, magnar da papa xe le moleche frite: el xe el più bel regalo che la laguna gabia fato ai venexiani.

Ma un bel giorno, farò la matada.

'ndarò a Rialto, e torò schie, garusoli, masanete, peoci, caparossoli, capelonghe, e forse anca na gransegola.

Co do tre ombre de pinot grigio e del radiceto amaro, altro che disnà da papa, DA DOGE!!!

Dai ricordi di Gianfraball